Dili matukib ang kalipay ug pagpasalamat sa katawhan sa lungsod sa Kalawit human nakapahimulos sa gipaabot nga Gugma Ayuda Ni Nanay Nene Program, Pebrero 11 sa Municipal Gymnasium.
Sila si Mr. Osies Rosello ug Ms. Emelda Villanueva, duha sa liboan nga katawhan nga nakadawat sa ayuda ni Nanay Nene, ang mapasalamaton pag-ayo ni Governor Rosalina “Nanay Nene” Jalosjos tungod kay bisan pa man sa kalayo sa ilang lugar, wala nagmakuli ang lalawigan nga mipadangat sa iyang programa alang kanilang katawhan nga nanimuyo sa hilit nga dapit.
Samtang si Kalawit Mayor Salvador Antojado uban sa mga ginsakpan, ang mipadayag usab sa ilang mainiton nga pagpasalamat ni Nanay Nene nga sukad sa ilang pagbukas sa pagsaulog sa sa ika-33 nga kasumaran sa pagkahimugso sa lungsod sa Kalawit kaniadtong Pebrero 9 hangtod pagtapos Pebrero 11, ang kagamhanang probinsyal padayon kining misuporta sa ilang lungsod.
Gipaabot sa Gugma Ayuda Ni Nanay Nene ang nagkalain-laing serbisyo gikan sa buhatan sa kagamhanang probinsyal pinaagi sa Office of the Provincial Agriculturist, Provincial Health Office, Provincial Social Welfare and Development Office ug Provincial Risk Reduction and Management Office.
Mihatag usab sa pag-serbisyo ang KASAMBAHAY Tayo Inc., 2nd Zamboanga del Norte Mobile Force Company, Kalawit Municipal Police Station ug Rural Health Unit sa Kalawit.
Mokabat sa usa ka libo ka molopyo sa maong lungsod ang nakadawat sa tag lima ka kilo sa bugas nga Pricess Bea nga gikan sa PSWDO.
Wala usab nagutman ang katawhan tungod kay adunay gipanghatag nga champorado ug adunay usa ka libo ka packed meals alang sa nakapahimulos sa maong Ayuda ni Nanay Nene.
Samtang, adunay 500 ka packs nga adunay sulod nga mga abono, binhi sa mais ug mga lain-laing liso sa utanon ang gipanghatag sa Office of the Provincial Agriculturist.
Adunay 551 ang nakapahimulos sa libreng konsulta, tambal ug bitamina, 103 ang nagpaibot ug ngipon, 15 ang nagpatuli diin, mokabat sa 669 ang tanang naka-benepisyo sa maong serbisyo sa Provincial Health Office.
(Source: Provincial Information Center Zanorte Facebook page)