Gipahigayon sa Dapitan City Fire Station ang Fire Square Roadshow sa Jollibee-Dapitan Branch sa Polo, Dapitan City niadtong Mayo 26 aron mapalig-on ang kahibalo ug kahandam sa mga empleyado batok sa sunog ug uban pang emerhensiya.
Gipangunahan ang kalihokan sa mga personnel sa Shift A ubos sa pagdumala ni FSINSP Rommel M. Rojas, Acting City Fire Marshal.
Lakip sa mga gihimo ang fire safety lecture, demonstrasyon sa hustong paggamit sa fire extinguisher ug fire drill aron mas mahibal-an sa mga partisipante ang angay buhaton panahon sa emerhensiya.
Matud sa Bureau of Fire Protection, kabahin kini sa padayon nilang kampanya sa pagpataas sa kahibalo sa kaluwasan, pag-andam sa komunidad ug pagpalig-on sa kahimtang sa mga trabahoan aron epektibong makatubag sa sunog ug medikal nga emerhensiya.(JENIFFER JR. DELICA)
Source: BFP R9 Dapitan City Fire Station