Nagtapok ang mga lokal ug nasyonal nga opisyal sa usa ka miting sa Dipolog aron hisgutan ang angay nga lakang sa gobyerno kabahin sa kaso sa usa ka overseas Filipino worker (OFW) nga napatay sa Lebanon.
Gipahigayon ang panagtagbo niadtong Abril 21 uban ni Department of Migrant Workers Undersecretary Bernard P. Olalia sa Ariana Hotel sa Barangay Minaog, diin gipasiugda ang koordinasyon sa mga ahensya alang sa hustong pagresponde sa insidente.
Lakip sa mga mitambong sila City Vice Mayor Senen O. Angeles, Provincial Vice Governor Julius C. Napigquit, 2nd District Representative Aireen G. Labadlabad, Provincial Chief of Staff Ernesto B. Rojo Jr., ug PSWDO Officer Hannah Lou G. Mandantes.
Sa miting, gihisgutan ang mga lakang aron masuportahan ang pamilya sa biktima, usa ka residente sa Barangay Olingan, nga gikatahong gipusil sa anak sa iyang amo sa Lebanon.
Gipasalig sa mga opisyal nga magpadayon ang gobyerno sa paghatag og tabang sa naulilang pamilya ug sa pagkoordinar sa mga ahensya aron matuman ang hustisya ug angay nga aksyon sa maong kaso.(IKEN B. GULLEM)
Source: Dipolog City Government