Pormal nang gipinal sa City Government of Dipolog ug mga event organizers ang iskedyul sa mga kalihokan alang sa Pagsalabuk Festival 2026, timaan sa pagsulod sa full-scale preparasyon sa maong selebrasyon.
Gikompirmar ang final nga iskedyul atol sa coordination meeting nga gipahigayon niadtong Abril 21 sa Social Hall sa Museo Dipolog, diin gihisgutan ang mga kritikal nga detalye aron masiguro ang organisado ug hapsay nga dagan sa festival.
Gipangunahan ni City Legal Officer Goldie Love P. Gonzales ang miting, uban sa nagkalain-laing stakeholders nga nalambigit sa pagpatuman sa mga kalihokan.
Sa nahisgutan, ang Pagsalabuk 2026 pagabuhaton gikan Mayo 15 hangtod 24, nga maglakip og lain-laing aktibidad nga magpasiugda sa kultura, turismo, ug panaghiusa sa katawhan sa Dipolog.
Sumala sa mga organisador, ang sayong pagplantsa sa iskedyul usa ka lakang aron malikayan ang kakulian sa implementasyon, mapalig-on ang koordinasyon sa mga ahensya, ug masiguro ang kahapsay ug kaluwasan sa tibuok selebrasyon.
Gilauman nga ang maong preparasyon makatabang sa malampusong pagpahigayon sa festival ug makahatag og positibong kasinatian sa mga lumulupyo ug bisita sa syudad.(IKEN B. GULLEM)
Source: Dipolog City Government