Ang Cebu Provincial Government dali nga mitubag sa report sa Commission on Audit (COA) 2024 nga nag-ingon nga tulo ka pasilidad nga gipundohan sa Capitol, nga nagkantidad og ₱50.4 milyon, wala pa nagamit bisan nahuman na kini lima hangtod pito ka tuig ang milabay.
Sumala ni Provincial Administrator Atty. Ace Durano, si Gov. Pamela Baricuatro nagtinabangay sa lain-laing ahensya sa gobyerno nga interesado gamiton ang mga pasilidad alang sa kaayohan sa mga Cebuano.
“From Day 1 pa lang gyod, mao nay direction ni Gov. Pam nga magamit gyod ni nga mga properties aron mapahimuslan,” segon ni Atty. Durano
Usa sa mga pasilidad, ang Cebu Provincial Skills Training Center sa Dakbayan sa Naga, karon gigamit na sa Inayagan National High School human ang ilang school buildings gi-declare nga dili na magamit tungod sa mga kalamidad sama sa linog ug bagyo. Ang pasilidad nga natapos sa 2018 sa kantidad nga ₱16.33 milyon karon nagdawat sa kapin 800 ka estudyante sa usa ka shift, nga nakapawala sa staggered schedule tungod sa kakulang sa luna.
Ang Bahay Pag-asa, natapos sa Oktubre 2020 sa kantidad nga ₱8.69 milyon, interesado gamiton sa PDEA-7 o sa DSWD ingon nga rehabilitation center para sa drug dependents o residential facility para sa mga bata nga naay problema sa balaod. Si Gov. Baricuatro bukas sa duha ka proposal ug ang desisyon pa gihimo sa hustong proseso.
Samtang, ang Cebu Provincial Dormitory sa Cebu City, natapos sa Disyembre 2019 sa kantidad nga ₱24.95 milyon, gitan-aw usab kung unsaon kini paggamit aron makahatag og kita. Ang Economic Enterprise Council gi-tahasan ni Gov. Baricuatro sa pag-explore og posible nga partnership sa public o private sector aron mapahimulosan ang pasilidad.
Source: Cebu Province PIO
I via Renante Socia Lada