Gibutyag ni Governor Darel Dexter T. Uy atol sa iyang unang State of the Province Address nga kapin P1 bilyon nga balor sa mga proyekto ang andam nang ipatuman sa nagkalain-laing bahin sa Zamboanga del Norte sa mosunod nga mga bulan.
Naglangkob kini sa mga proyekto sa kadalanan, tulay, mga pasilidad sa gobyerno ug water supply systems nga gitumong sa pagpalig-on sa imprastruktura ug pagpaspas sa paghatod sa serbisyo ngadto sa mga komunidad sa tibuok probinsya.
Lakip sa mga mayor nga proyekto ang kapin P569 milyon alang sa road ug bridge projects, kapin P431 milyon alang sa mga building ug pasilidad sa gobyerno, ug kapin P3.5 milyon alang sa mga proyekto sa tubig ug water facilities.
Gipasiugda usab sa gobernador ang umaabot nga kapin P500 milyong Salug-Godod Farm-to-Market Road Project ug ang padayon nga mga proyekto sa Mindanao Inclusive Agriculture Development Project sa Sibuco, nga gilauman makatabang sa mga mag-uuma ug makapadasig sa kalamboan sa ekonomiya sa probinsya.(JENIFFER JR. DELICA)
Source: Zamboanga del Norte Provincial News Network