Gipasiugda sa City Nutrition Office sa Dapitan City ang kahinungdanon sa hustong nutrisyon sa unang 1,000 ka adlaw sa kinabuhi sa bata pinaagi sa usa ka advocacy seminar nga gipahigayon sa Amphitheater sa Government Center.
Gitambongan ang kalihokan sa mga Barangay Nutrition Scholars, mga mabdos ug nagpasusong inahan gikan sa 10 ka barangay aron mapalawom ang ilang kahibalo sa hustong pag-atiman sa inahan ug bata.
Gituki sa seminar ang kritikal nga papel sa nutrisyon gikan sa panahon sa pagmabdos hangtod sa pag-abot sa ikaduhang tuig sa bata, nga giila isip labing mahinungdanong yugto sa iyang paglambo sa lawas ug pangisip.
Gidasig usab ang mga ginikanan ug mga nutrition frontliners nga mahimong aktibong tigpalambo sa maayong nutrisyon aron masiguro nga ang matag batang Dapitanon motubo nga himsog ug andam alang sa maayong kaugmaon.(JENIFFER JR. DELICA)
Source: City Information Division- Dapitan