Trenta (30) ka miyembro sa Goin Farmers Agrarian Reform Beneficiaries Association (GFARBA) sa Barangay Goin ang nakadawat og ₱1 milyong livelihood assistance gikan sa Department of Labor and Employment (DOLE) Zamboanga del Norte Field Office alang sa pag-palambo sa ilang peanut processing enterprise.
Gihatag kini ubos sa DOLE Integrated Livelihood Program (DILP) pinaagi sa Liloy Satellite Office ug sa Accredited Co-Partner nga Tampilisan United Farmers Multi-Purpose Cooperative.
Pinaagi sa maong proyekto, mapalambo sa asosasyon ang produksiyon sa peanut butter, roasted peanuts ug salted peanuts, nga gilauman nga makadugang sa ilang kita ug makapalapad sa merkado.
Atol sa turnover ceremony, giawhag ni DOLE Zamboanga del Norte Field Office Head Aileen B. Mondejar ang mga miyembro nga ipadayon ang panaghiusa ug kooperasyon aron masiguro ang kalamboan ug kalungtaran sa ilang panginabuhian.
Kabahin usab ang proyekto sa padayon nga paningkamot sa DOLE sa pagpalig-on sa malungtarong panginabuhian ug paghatag og dugang oportunidad sa mga komunidad sa kabaryohan.(IKEN B. GULLEM)
Source: DOLE IX- Zamboanga del Norte Field Office