Mas gipalapad pa sa probinsya sa Zamboanga del Norte ang ilang kampanya sa preventive healthcare alang sa kabataan pinaagi sa paglusad sa libreng pediatric check-up nga ipahigayon sa umaabot Mayo 2, 2026 sa Zamboanga del Norte Medical Center (ZNMC) – Outpatient Department.
Kini nga inisyatiba kabahin sa padayon nga programa sa provincial government ubos sa liderato ni Gov. Darel Uy nga nagtumong nga mapalig-on ang sayong pag-ila ug paglikay sa mga sakit sa kabataan pinaagi sa regular nga medikal nga screening.
Ang maong serbisyo pagadumalaon ni Dr. Noel Astrologo, usa ka espesyalista sa Pediatric Surgery, nga maghatag og libreng konsultasyon, eksaminasyon, ug tambag sa mga ginikanan bahin sa hustong pag-atiman sa panglawas sa ilang mga anak.
Giawhag ang tanang ginikanan nga dalhon ang ilang mga anak aron mapahimuslan ang libre nga serbisyo, ilabi na kadtong gikan sa mga kabus nga sektor nga kasagaran walay regular nga access sa pediatric care.
Alang sa dugang impormasyon, ang mga interesado mahimong moduol sa ZNMC Medical Team Office sa Sicayab, Dipolog City o sa OSAC Office-Medical Health Referral sa Provincial Capitol sa Estaka, Dipolog City.(IKEN B. GULLEM)
Source: Zamboanga del Norte Provincial News Network