Nabawi sa Cebu City Police Office (CCPO) ang usa ka gikawat nga iPhone 15 pinaagi sa ilang paspas nga responde ug epektibong imbestigasyon ubos sa pagpangulo ni City Director PCOL George V. Ylanan. Gipakita niini ang lig-on nga paningkamot sa kapulisan sa pagpanalipod sa katawhan ug ilang kabtangan.
Nahitabo ang insidente sa seawall area sa Cebu City diin gikawat sa usa ka wala mailhing suspek ang cellphone sa biktima samtang didto siya nagtambay. Human sa panghitabo, dali nga miduol ang biktima sa pulis aron mangayo og tabang, hinungdan nga dali milihok ang CCPO sa follow-up operations.
Pinaagi sa koordinasyon sa mga responding officers ug paggamit sa teknolohiya sama sa “Find My” application, natultulan sa mga otoridad ang lokasyon sa cellphone ug malampusong nabawi kini nga walay nahitabong insidente.
Sa alas-12:00 sa udto kagahapon Abril 26, 2026, pormal nga gitunol balik sa kapulisan ang cellphone ngadto sa tag-iya sulod sa police station. Dako ang pagpasalamat sa biktima sa mga pulis tungod sa ilang paspas nga aksyon, propesyonalismo, ug dedikasyon sa serbisyo.
Gidayeg ni PCOL Ylanan ang mga operatiba sa ilang paspas nga pagtubag ug gipasiugda ang importansya sa daling pag-report sa mga krimen ngadto sa kapulisan aron dali kini maaksyunan. Matod pa niya, ang maong kalampusan nagpakita nga pinaagi sa kooperasyon sa komunidad ug paggamit sa teknolohiya, posible ang positibong resulta sa operasyon.
Padayon nga gipakita sa CCPO ang ilang dedikasyon sa pagmintinar sa kalinaw ug kahapsay sa Cebu City ug sa pagpalig-on sa pagsalig sa publiko pinaagi sa responsableng serbisyo sa kapulisan.
Source: CCPO
I via Renante Socia Lada