Human sa dakong kalampusan sa Saulog ZaNorte Agri-Tourism Fair 2026, mikabat sa kapin P2.3 milyon ang kinatibuk-ang halin nga natala gikan sa mga lokal nga produkto nga gipasundayag ug gibaligya sa tulo ka distrito sa Zamboanga del Norte.
Base sa consolidated sales performance report sa Office of the Provincial Agriculture, nakatigom og P2,366,838.75 nga halin ang patigayon nga gipahigayon sulod sa unom ka adlaw gikan Hunyo 1 hangtod 6 isip kabahin sa pagsaulog sa ika-74 nga anibersaryo sa probinsya. Nanguna sa halin ang Tersero Distrito nga adunay kapin P1.15 milyon, gisundan sa Primero Distrito nga adunay P637,693.75.
Sa lebel sa mga lokal nga panggamhanan, ang Baliguian maoy nanguna sa Tersero Distrito nga adunay halin nga P244,453, samtang ang Sibutad maoy nanguna sa Primero Distrito nga adunay P194,985. Sa Segundo Distrito, ang Dakbayan sa Dipolog maoy nakarekord sa pinakataas nga halin nga mikabat sa P207,003.
Gipakita sa maong resulta ang nagkadakong suporta sa publiko alang sa mga produktong lokal ug nagpamatuod sa kalig-on sa sektor sa agrikultura, turismo, ug MSMEs sa probinsya. Nagpabilin usab nga epektibong plataporma ang Agri-Tourism Fair sa pag-abli og dugang oportunidad sa merkado ug panginabuhian alang sa mga mag-uuma ug lokal nga negosyante sa Zamboanga del Norte.(IKEN B. GULLEM)
Source: Zamboanga del Norte Provincial News Network