Gilauman nga mopadasig sa sektor sa agrikultura ug ekonomiya sa Zamboanga del Norte ang gisugyot nga pagtukod sa International Agricultural Port sa Provincial Agri-Industrial Center (PAIC) sa Barangay Irasan, Roxas, nga gitan-aw isip usa ka dakong lakang sa pagpalig-on sa agri-trade ug logistics sa probinsya.
Gihisgutan ang maong proyekto atol sa panagtagbo nila ni Department of Agriculture Secretary Francisco T. Laurel Jr., Food Terminal Inc. President ug Chief Executive Officer Joseph Rudolph C. Lo, Governor Darel Dexter T. Uy, Dipolog City Mayor Roberto “Berto” Uy ug Dapitan City Mayor Evelyn “Belen” Uy, diin gituki ang mga posibilidad ug benepisyo niini alang sa Zamboanga del Norte ug sa tibuok rehiyon.
Sumala sa mga opisyal, ang International Agricultural Port makatabang sa mas paspas ug episyenteng paglihok sa mga produktong agrikultural ngadto sa lokal ug internasyonal nga merkado, samtang magbukas usab kini og dugang oportunidad alang sa mga mag-uuma, mangingisda, agripreneurs ug mga mamumuhunan.
Gituohan usab nga ang maong proyekto makapalig-on sa produksyon, makapauswag sa kalidad sa mga produkto ug makadani og dugang pamuhunan nga makahatag og bag-ong kusog sa ekonomiya sa probinsya, samtang nagpadayon ang mga pagtuon ug preparasyon alang sa iyang posibleng implementasyon.(JENIFFER JR. DELICA)
Source: Zamboanga del Norte Provincial News Network