Pagpalig-on sa kaluwasan ug kahandam batok sa kalamidad padayong gipasiugda atol sa gipahigayong Second Quarter Nationwide Simultaneous Earthquake Drill (NSED) didto sa Zamboanga del Norte Police Provincial Office (ZNPPO) Parade Ground Camp Hamac, Sicayab, Dipolog City, alas 9 sa buntag kagahapong adlawa Hunyo 18, 2026.
Kini nga kalihokan gitumong sa pagpalig-on sa disaster preparedness ug pagdugang sa kahibalo sa mga pulis ug uban pang mga stakeholder bahin sa hustong mga pamaagi sa pagresponde, ilabina human sa sunod-sunod nga mga linog nga nasinati sa nagkalain-laing bahin sa Mindanao sa miaging mga adlaw.
Gipunting sa drill ang pagpraktis sa “Duck, Cover, and Hold”, pagsulay sa emergency response plans sa mga ahensya ug institusyon, paghatag first aid ug medical assistance, ug pagpalambo sa koordinasyon sa mga responders aron mamenosan ang risgo sa pagkawala sa kinabuhi ug kadaot sa kabtangan panahon sa tinuod nga emerhensya.
Gipasiugda niini nga ang regular nga pag-apil sa maong mga pagbansay mahinungdanon sa pagpalambo sa koordinasyon, disiplina, ug kahandam sa tanang personahe ug mga kaabag sa komunidad.
Gi-awhag usab ni PCOL Reydante E Ariza Provincial Director, ZNPPO ang tanang kapulisan nga seryosohon ang ilang pag-apil sa NSED nga gihulagway niyang usa ka mahinungdanong pagbansay alang sa kaluwasan sa matag personahe.
Dugang usab ni Provincial Disaster Risk Reduction and Management Office (PDRRMO) Admin & Training Division Head, Mr. Norman M. Alegarbes ang pagpahigayon sa Earthquake Drill angay lang nga seryosohon ug hatagan importansya.
Kini nga Nationwide Simultaneous Earthquake Drill usa ka tinuig nga kalihokan sa gobyerno nga gipangulohan sa Office of Civil Defense (OCD) aron mapalig-on ang kultura sa disaster preparedness ug resiliency sa tanang sektor sa katilingban.(IKEN B. GULLEM)