Gipalig-on sa Dapitan City Fire Station ang kahandam sa mga estudyante ug magtutudlo sa Bacong Integrated School pinaagi sa pagpahigayon og Fire Safety Lecture ug Fire Drill niadtong Hunyo 17, 2026.
Ubos sa pagpanguna ni Acting Fire Marshal FSINSP Rommel M. Rojas, gihatagan ang mga partisipante og kahibalo kabahin sa fire prevention, fire safety practices ug hustong mga lakang panahon sa sunog. Gipahigayon usab ang Exit Drill in the Home lecture aron mas masabtan sa mga estudyante ug personnel ang importansya sa kahandam sulod sa ilang panimalay.
Human sa lecture, gihimo ang fire drill diin gipraktis sa mga estudyante, magtutudlo ug kawani ang hapsay ug organisadong pag-evacuate panahon sa emerhensiya. Mas gipasiugda ang importansya sa maong kalihokan tungod kay ang eskwelahan nahimutang sa lugar nga maagian lamang pinaagi sa dagat.
Nagpasalamat usab ang BFP sa kooperasyon ug suporta ni School Head Mrs. Vina S. Baes sa malampusong pagpatuman sa kalihokan. Sumala sa estasyon, padayon nilang dad-on ang mga programa sa fire safety ug disaster preparedness aron mas daghang komunidad ang mahimong andam ug luwas sa panahon sa emerhensiya.(JENIFFER JR. DELICA)
Source: BFP R9 Dapitan City Fire Station