Opisyal nang gisugdan og orient sa Dakbayan sa Dapitan ang 30 ka incoming first-year college students gikan sa mga pribadong eskwelahan isip mga bag-ong benepisyaryo sa City Scholarship Program pinaagi sa usa ka scholarship orientation nga gipahigayon niadtong Hunyo 17 sa Amphitheater, Government Center.
Gipangunahan ang kalihokan ni Vice Mayor Gabriel M. Cad, OIC City Administrator Danilo S. Areños Jr., City Councilor Ruel Nadela, Atty. Meriam W. Quimbo, uban sa ubang mga opisyal ug kawani sa Local Government Unit.
Atol sa orientation, gipatin-aw sa mga opisyal ang mga polisiya ug mga kinahanglanon sa programa, lakip ang academic requirements, tuition fee coverage, educational allowances, ug ang hustong proseso sa pagbayad sa tuition ug pagliquidate sa mga gastusin. Gihisgutan usab ang responsibilidad sa mga scholars sa pagmintinar sa angayang grado ug aktibong pag-apil sa mga kalihokan sa dakbayan.
Ubos sa programa, makadawat ang matag iskolar og pinansyal nga tabang sulod sa upat ka tuig o walo ka semestre, basta makasunod sa mga lagda ug academic standards nga gitakda sa scholarship.
Gitapos ang kalihokan pinaagi sa pagpirma sa Memorandum of Agreement (MOA), nga nagsimbolo sa panaghiusa sa City Government ug sa mga scholars sa pagpaningkamot alang sa kalampusan sa ilang edukasyon ug sa pagserbisyo sa komunidad sa umaabot.(IKEN B. GULLEM)
Source: Dapitan City Government