Kapin 500 ka mga barangay sa Zamboanga del Norte ang nakadawat na og pondo gikan sa kagamhanang probinsyal alang sa implementasyon sa ilang lokal nga mga proyekto ubos sa administrasyon ni Gov. Darel Uy.
Sumala sa Provincial Capitol, 217 ka barangay ang nakadawat og tig-P1 milyon samtang 268 pa ka barangay ang nakadawat og tig-P800,000 alang sa ilang development projects.
Gipadayag usab sa kapitolyo nga gipadayon sa kasamtangang administrasyon ang 68 ka proyekto nga napondohan sa miaging liderato, samtang 28 pa ka dugang proyekto ang kasamtangang ginatrabaho ug giaprubahan ubos sa pagdumala ni Gov. Uy. Upat niini ang nahuman na.
Lakip sa mga nakompleto nga proyekto mao ang pagtukod ug pag-ayo sa mga classroom building sa mga eskwelahan sa Baliguian ug Mutia, ingon man ang concreting sa Fatima-Communal Provincial Road Phase II sa Liloy.
Nahisgutan ang maong updates atol sa ikatulong panagtagbo sa Provincial Project Monitoring Committee nga gipanguluhan ni Charmie Yu uban sa mga hepe sa nagkadaiyang buhatan sa kapitolyo niadtong Mayo 7 sa Provincial Capitol sa Dipolog City.
Gipaila usab atol sa maong tigum ang bag-ong monitoring form nga gamiton aron masubay ang implementasyon ug progreso sa mga proyekto sa probinsiya.(IKEN B. GULLEM)
Source: RoNey PaCilan TV