Kabsan sa iyang hinulaman nga kinabuhi ang usa ka 65 anyos nga senior citizen, human kini gitigbas sa usa ka 32 anyos atol sa usa ka mainit nga panaglalis nga nahitabo pasado alas 10:30 ang takna sa kabuntagon niadtong Mayo 3,2026 didto sa Purok 4, Sitio Litab, Brgy. Balubo, Roxas, Zamboanga del Norte.
Ang maong biktima naila nga usa ka 65 anyos nga babayeng balo ug residente sa nasangpit nga lugar kinsa giingong nalambigit sa usa ka mainit nga panaglalis nga mihamtong sa pagtigbas ngadto sa biktima sa usa ka suspek nga usa ka 32 anyos, lalaki, ulitawo, walay trabaho, ug residente usab sa samang lugar.
Basi sa pakigsusi matod pa ang mga personahe sa Roxas Municipal Police Station nakadawat og report gikan sa usa ka nagpakabana nga lungsuranon bahin sa giingong insidente sa pagpanunggab nga daling girespondehan sa kapulisan aron susihon ang insidente diin gibana-bana nga 25 kilometros ang gilay-on sa maong lugar nga nahitaboan gikan sa estasyon sa kapulisan.
Sa pag-abot sa mga otoridad sa lugar nagpahigayon gilayon kinig inisyal nga imbestigasyon ug nakighinabi ngadto sa mga saksi.
Nasayran nga nahitabo ang panaglalis tali sa biktima ug suspek nga maoy nahimong hinungdan nga mikuha ug bolo ang maong suspek nga maoy gigamit sa pagtigbas sa biktima nga miresulta sa kamatayon niini.
Ang biktima daling gidala sa Roxas Rural Health Unit alang sa medikal nga atensyon apan gideklarar kini nga dead on arrival sa nag-atiman nga doktor tungod sa dakong hemorrhage ug traumatic brain injury.
Samtang ang suspek gidakop dayon sa mga mirespondeng pulis sa lugar sa insidente ug gipahibalo sa iyang mga katungod sa konstitusyon ug karon anaa na kini sa kustodiya sa Roxas Municipal Police Station alang sa hustong disposisyon ug pagpasaka sa angay nga mga kaso.(MEDALYN U. BORJA)
Source: ZNPPO