Gisugdan sa Lokal nga Panggamhanan sa Dapitan ang usa ka bag-ong kapitulo sa ilang serbisyo pinaagi sa pag-ilis sa opisyal nga uniporme sa mga empleyado, nga gipakita atol sa flag-raising ceremony niadtong Mayo 4 sa Government Center.
Sa pagpanguna ni Mayor Evelyn “Belen” T. Uy, gipaila ang bag-ong Filipiniana ug Barong Tagalog nga estilo sa uniporme nga karon opisyal nang gamiton sa mga kawani sa syudad.
Kini nga kausaban sa uniporme dili lang bahin sa panagway, kundili usa ka lakang padulong sa mas organisado ug disiplinadong trabahoan. Sumala sa mga kawani, ang bag-ong uniporme nagdala og bag-ong pagbati sa responsibilidad ug kahinam sa ilang adlaw-adlaw nga trabaho.
Pinaagi niini nga inisyatibo, gipakita sa Dapitan LGU nga ang gagmay nga kausaban sama sa uniporme mahimong dakong simbolo sa mas lig-on, mas organisado, ug mas kasaligan nga serbisyo alang sa katawhan.(IKEN B. GULLEM)
Source: City Government of Dapitan