Miresponde ang Shift A personnel sa Dapitan City Fire Station sa usa ka insidente diin usa ka tawo ang gikulata sa Barangay Kauswagan, Dapitan City niadtong Hulyo 24 ug dihadiha gihatagan kini og emergency medical assistance.
Pag-abot sa mga responder, ilang naabtan ang biktima nga nakamata ug makatubag apan nagreklamo og pagkalipong ug grabeng kasakit sa duha ka aping ug sa apapangig. Namatikdan usab ang mga bun-og sa nawong ug kalisod sa pag-abli sa baba tungod sa kasakit. Human sa assessment, gihatagan dayon kini og cold compress aron mamenosan ang hubag ug kasakit.
Dayon nga gidala ang biktima sakay sa BFP ambulance ngadto sa Dr. Jose Rizal Memorial Hospital alang sa dugang nga eksaminasyon ug pagtambal, samtang padayon nga gimonitor sa EMS team ang iyang kahimtang atol sa biyahe.
Luwas nga natugyan sa mga responder ang pasyente ngadto sa mga medical personnel sa ospital uban sa resulta sa ilang assessment ug sa pre-hospital care nga ilang nahatag aron mapadayon ang hustong pag-atiman.(JENIFFER JR. DELICA)
Source: BFP R9 Dapitan City Fire Station