Girepaso ug gisubay sa Provincial Anti-Drug Abuse Council (PADAC) ang implementasyon sa Local Anti-Drug Plan of Action (LADPA) sa Zamboanga del Norte atol sa Inter-Agency Implementation Forum nga gipahigayon niadtong Hulyo 16 sa Hall 3, Provincial Capitol Building sa Dipolog City.
Tumong sa forum ang pagtimbang-timbang sa kahimtang sa pagpatuman sa mga programa ug serbisyo nga gilatid sa LADPA, ilabina ang mga lakang sa lalawigan batok sa paggamit ug pag-abuso sa gidili nga droga.
Kini nga kalihokan gipangunhan sa PADAC Core Team ubos sa pagpangulo ni PADAC Focal Person Engr. Dioscoro G. Endab, uban sa partisipasyon sa nagkadaiyang ahensya ug mga opisina sa gobyerno nga miyembro sa konseho.
Atol sa forum, gisusi ang mga programa nga nahimo na, ang wala pa mapatuman, ug ang mga lakang nga kinahanglan pang mapalig-on aron hingpit nga maimplementar ang plano.
Gihatagan usab og update ni DILG-Zamboanga del Norte ADAC Focal Person LGOO II Faye Edcel Marie C. Orga ang mga partisipante bahin sa kahimtang sa implementasyon sa LADPA ug ang mga kakulangang kinahanglan matubag.
Lakip sa mga ahensyang adunay dakong papel sa pagpatuman sa LADPA ang Philippine National Police (PNP), Philippine Drug Enforcement Agency (PDEA), Philippine Drug Enforcement Group (PDEG), Provincial Drug Enforcement Unit (PDEU), Provincial Health Office (PHO), Department of Education (DepEd), ug Provincial Social Welfare and Development Office (PSWDO), nga nagtinabangay sa pagpalig-on sa kampanya batok sa ilegal nga droga.(IKEN B. GULLEM)
Source: Zamboanga del Norte Provincial News Network