Napugngan sa Philippine Coast Guard (PCG) ang transportasyon sa gibanabanang ₱1.32 milyon nga kantidad sa mga suspetsadong smuggled cigarettes human kini masakpi sa Port of Dapitan atol sa usa ka hiniusang anti-smuggling operation.
Nasakmit sa CGK9 Team-ZDN, CGSS Dapitan, CGIU-ZDN, Maritime Police, ug Philippine Ports Authority (PPA) ang 951 reams sa BOSQU ug 204 reams sa NEW MEGA MENTHOL nga gitagong sulod sa usa ka Ceres Bus nga paingon unta sa Dumaguete City pinaagi sa Ro-Ro vessel.
Kabahin ang maong operasyon sa gipakusgang kampanya sa PCG batok sa smuggling ug uban pang ilegal nga kalihokan sa kadagatan aron mapugngan ang pagpasulod ug pagbiyahe sa mga kontrabando sa lalawigan.
Gipasiugda sa Coast Guard nga ang maong kalampusan bunga sa lig-on nga koordinasyon sa nagkadaiyang law enforcement agencies ug sa padayon nilang pagbantay sa mga pantalan aron mapalig-on ang seguridad ug pagsumpo sa ilegal nga transportasyon sa mga kontrabando.(IKEN B. GULLEM)
Source: Coast Guard Station Zamboanga del Norte