Opisyal nang gitunol sa Local Government Unit (LGU) of Gutalac ang duha ka bag-ong proyekto nga gilauman nga makapauswag sa serbisyo publiko ug kalidad sa kinabuhi sa mga residente atol sa turnover ceremony niadtong Hulyo 16, 2026.
Lakip sa mga gitunol ang Multi-Purpose Youth Center sa Poblacion nga gipondohan ubos sa Seal of Good Local Governance Incentive Fund (SGLGIF) Fiscal Year 2024, ug ang Water System Project sa Barangay Salvador nga gipatuman pinaagi sa Local Government Support Fund–Growth Equity Fund (LGSF-GEF) Fiscal Year 2023.
Ang bag-ong Youth Center gilauman nga mahimong lugar alang sa mga kalihokan, pagkat-on, ug pagpalambo sa talento sa kabatan-onan, samtang ang Water System Project maghatag og mas limpyo ug mas kasaligan nga suplay sa tubig alang sa mga benepisyaryo sa barangay.
Sumala sa LGU Gutalac, kabahin kini sa ilang padayon nga paningkamot sa pagpalig-on sa imprastraktura ug paghatag og mas episyente nga serbisyo ngadto sa katawhan.
Gipasalamatan usab sa lokal nga panggamhanan ang Department of the Interior and Local Government (DILG), mga partner agencies, ug tanang mitabang sa pagpatuman sa maong mga proyekto, samtang gipadayon sa administrasyon ni Mayor Eddie Justin T. Quimbo ug Vice Mayor Aljohn M. Garzon ang ilang paningkamot alang sa mas progresibo ug mas lig-on nga Gutalac.(IKEN B. GULLEM)
Source: LGU Gutalac-Public Information