Nasakmit sa Zamboanga del Norte Maritime Police ang usa ka iligal nga “paulbo” nga panagat atol sa seaborne patrol operation sa kadagatan sa Barangay Olingan sayo sa kaadlawon niadtong Marso 22, 2026.
Sumala sa report nga gihatud sa City Agriculture Office ubos sa pagdumala ni City Agriculturist Engr. Kerr C. Porlas, nadakpan ang usa ka small-scale commercial fishing boat nga gimarkahan og “F/B ANDRE 22” nga ginabigar ni Gulle Alie y Bayonas, 49 anyos, residente sa maong lugar.
Kining operasyon gipangunahan sa mga personahe sa Maritime Police lakip nila PSMS Romeo G. Pagulayan Jr., PMsg Mark Ian Molina, PMsg Ronel B. Carcallas, ug PMsg Vern Sal M. Sevilla ubos sa superbisyon ni Station Chief PCPT Allan S. Pestanas.
Sa inspeksyon sa mga papeles sa sakayan, nasuta nga usa sa mga tripolante walay balidong lisensiya gikan sa DA-BFAR Region 9, nga maoy klarong paglapas sa Section 113 sa Republic Act 10654. Tungod niini, gi-aresto ang kapitan sa sakayan.
Nasakmit usab ang nagkadaiyang kagamitan lakip ang fishing boat nga nagkantidad og P100,000, makina nga nagbalor og P70,000, ug mga gamit sa panagat nga nagkantidad og P30,000, nga adunay kinatibuk-ang bili nga P200,000.
Samtang, ang suspek ug ang mga ebidensiya karon anaa sa kustodiya sa ZDN Maritime Police ug ginahimo ang kaso nga ipasaka sa BFAR 9 Adjudication Committee alang sa hustong disposisyon.(IKEN B. GULLEM)
Source: Dipolog City Government