Gipasiugda sa probinsyal nga panggamhanan ang pagpalig-on sa pondo ug implementasyon sa climate adaptation program nga “Project LAWA at BINHI” human sa miting ni Acting Provincial Governor Julius C. Napigquit uban sa Department of Social Welfare and Development (DSWD) kaniadtong Marso 23, 2026.
Sentro sa diskusyon ang pagpalapad sa benepisyo sa programa nga naghatag og cash-for-work ngadto sa mga mag-uuma, mangingisda, ug ubos-kita nga mga pamilya, samtang ginapalig-on usab ang ilang kapasidad batok sa epekto sa hulaw ug kakulang sa pagkaon.
Ang Project LAWA (Local Adaptation to Water Access) ug BINHI (Breaking Insufficiency through Nutritious Harvest for the Impoverished) naglakip sa pagtukod og gagmay’ng water reservoirs, communal gardens, ug water-harvesting systems aron masiguro ang padayon nga suplay sa tubig ug pagkaon sa mga komunidad.
Mitambong sa miting ang DSWD Disaster Response Management Division (DRMD) team nga gilangkuban nila Jeffrey Toribio, Foriraida Anni, ug Berisa Jain, uban sa mga representante gikan sa Provincial Disaster Risk Reduction and Management Office (PDRRMO), Provincial Social Welfare and Development Office (PSWDO), ug Office of the Provincial Agriculturist.
Kini nga lakang nagpakita sa tumong sa probinsya nga mapadali ang pag-abot sa pondo ug serbisyo ngadto sa mga komunidad nga labing nanginahanglan, ilabi na sa panahon sa epekto sa climate change.(IKEN B. GULLEM)
Source: Gov Darel Uy