Malampusong gi-selebrar sa Dakbayan sa Dapitan ang usa ka semana nga selebrasyon sa ika-63 Charter Day pinaagi sa nagkadaiyang kalihokan nga naghiusa sa kultura, serbisyo publiko, ug mga programa alang sa kalamboan sa komunidad.
Gisugdan ang katapusang adlaw sa selebrasyon pinaagi sa Misa sa St. James the Greater Parish, gisundan sa Free Legal Clinic, Bangus Dish Preparation Contest ug Bangus Deboning Contest nga gipasiugdahan sa City Agriculture Office.
Nagpadayon usab ang selebrasyon pinaagi sa Larong Pinoy, city-wide motorcade, ug Program Proper, nga gitapos sa Boodle Fight ug Bangus Festival sa City Government Center Grounds.
Atol sa programa, gipaila ang bag-ong batch sa Dapitan City Scholars ug gipasidunggan ang lima ka labing maayong barangay pinaagi sa 2026 Lupong Tagapamayapa Incentives Awards. Gipahigayon usab ang bendisyon ug turnover sa bag-ong mga service vehicle sa lokal nga panggamhanan.
Usa sa mga mahinungdanong nahitabo mao ang pagpirma sa Memorandum of Agreement (MOA) tali ni City Mayor Evelyn T. Uy ug BFAR-9 Regional Director Al-Zath K. Kunting alang sa pagpatuman sa FishCORE Project ug paghatag og mga bangka ug kagamitan sa mga mangingisda aron mapalig-on ang ilang panginabuhian.
Mitambong usab sa maong selebrasyon sila Zamboanga del Norte Governor Darel Dexter T. Uy, 1st District Congressman Roberto T. Uy Jr., ug Dipolog City Mayor Roberto Y. Uy, nga mipadayag sa ilang suporta sa padayon nga kalamboan sa Dakbayan sa Dapitan.(IKEN B. GULLEM)
Source: Zamboanga del Norte Provincial News Network