Gipasundayag sa tulo ka atleta sa Zamboanga del Norte ang ilang kalampusan human makadaog og mga medalya sa Adidas Open International Karate Championship 2026 nga gipahigayon sa Jakarta, Indonesia niadtong Hunyo 5 hangtod 7.
Sa ilang courtesy visit kang Governor Darel Dexter T. Uy sa Provincial Governor’s Office niadtong Hunyo 22, gipresentar nila Izzy Steph Mah, Ian Stephen Mah, ug Kim Villocillo ang ilang mga medalya isip simbolo sa ilang paningkamot ug dedikasyon sa dula.
Nakadaog si Izzy Steph Mah og duha ka bulawang medalya sa Cadet Kumite Female -54 kg ug Cadet Individual Kata Female 14 Years Old and Below. Samtang si Ian Stephen Mah nakakuha og duha ka silver medal sa Senior Kumite Male -55 kg ug Senior Kata Male, ug si Kim Villocillo nakadaug usab og silver medal sa Kumite Male 21 Years Old and Above -55 kg.
Sumala sa Provincial Information Center, dako ang natampo sa ilang kalampusan sa Batang Karate Mga Anak ni Mayora Program nga gisugdan ni Rizal Mayor Marissa Manigsaca, nga nagtumong sa pagpalambo sa talento sa kabatan-onan pinaagi sa sports ug paghatag kanila og mas daghang kahigayonan.
Matud ni Ian Stephen Mah, nagpadayon ang ilang pagpangandam alang sa umaabot nga mga lokal ug internasyonal nga torneyo, lakip ang Visayas-Mindanao Open Karate Championship Tournament nga pagaabuton sa Munisipyo sa Rizal.
Ang ilang kadaugan sa Indonesia nagpakita nga pinaagi sa disiplina, paningkamot, ug suporta sa komunidad, mahimong maabot sa mga atleta sa Zamboanga del Norte ang internasyonal nga kalampusan.(IKEN B. GULLEM)
Source: Zamboanga del Norte Provincial News Network