Gisaulog sa Barangay Gulayon ang ika-52 nga Nutrition Month pinaagi sa usa ka kalihokan nga gipahigayon sa Balabag Covered Court niadtong Hulyo 7 aron mapalig-on ang kampanya batok sa malnutrisyon ug pagdasig sa himsog nga panginabuhi sa komunidad.
Gipangunahan ang kalihokan sa Barangay Council ubos ni Punong Barangay Mary Jane V. Cuenca sa pakigtambayayong sa City Government of Dipolog pinaagi sa City Nutrition Division nga gipangulohan ni City Nutrition Action Officer Riza Jane B. Zamoras.
Mitambong usab ang mga representante sa City Social Welfare and Development Office, City Agriculture Office ug City Health Office, diin ilang gipasiugda ang kamahinungdanon sa hustong nutrisyon, himsog nga pamaagi sa panginabuhi ug aktibong partisipasyon sa komunidad.
Sumala sa City Government of Dipolog, ang maong kalihokan kabahin sa padayon nga paningkamot sa pagpalambo sa panglawas ug kaayohan sa matag Dipolognon pinaagi sa mga programa sa nutrisyon sa lebel sa barangay.(JENIFFER JR.DELICA)
Source: Dipolog City Government