Gibuksan sa Dakbayan sa Dipolog ang ika-5 nga Inter-Barangay Persons with Disabilities o PWD Day Paugnat 2026 niadtong Hulyo 17 isip kabahin sa pagsaulog sa ika-48 nga National Disability Rights Week.
Nasugdan ang kalihokan pinaagi sa motorcade ug gisundan sa mga kompetisyon sa badminton, volleyball, chess ug darts sa Barangay San Jose Covered Court, diin nagtigom ang mga partisipante gikan sa mga barangay sa Sinaman, Cogon, Diwan, Sangkol ug San Jose.
Gipangulohan sa Persons with Disabilities Federation ubos sa City Social Welfare and Development Office ang maong kalihokan, uban sa PWD Federation sa Barangay San Jose isip host, aron mapalig-on ang partisipasyon, panaghiusa ug pagpakita sa mga talento sa mga persons with disabilities.
Kabahin ang maong selebrasyon sa pagpasidungog sa National Disability Rights Week nga nagtumong sa pagpalambo sa patas nga partisipasyon ug inklusibong kalamboan alang sa tanang persons with disabilities.(JENIFFER JR. DELICA)
Source: Dipolog City Government