Niadtong Marso 17, 2026, malampusong gipahigayon sa Local Government Unit (LGU) sa Gutalac, ubos sa pagpangulo ni Mayor Eddie Justin Quimbo, ang Integrated Disaster Shelter Assistance Program (IDSAP) pay-out alang sa 11 ka benepisyaryo nga naapektuhan sa nag-unang mga kalamidad sa miaging tuig.
Gipatuman ang programa sa pakigtambayayong sa Department of Human Settlements and Urban Development (DHSUD), diin ang mga nakabenepisyo mao ang direktang naapektuhan sa Intertropical Convergence Zone (ITCZ) niadtong Setyembre 2025 ug Typhoon Uwan niadtong Nobyembre 2025 nga nakapahinabo og dakong kadaut sa ilang mga panimalay.
Sumala sa LGU Gutalac, tumong sa IDSAP ang paghatag og pinansyal nga tabang aron matabangan ang mga pamilya sa pag-ayo o pagtukod pag-usab sa ilang mga balay human sa kalamidad.
Gipasalamatan usab sa lokal nga panggamhanan ang DHSUD sa padayon nga suporta ug kooperasyon, nga nakatabang sa pagpalig-on sa mga programa alang sa mga residente sa Gutalac.(IKEN B. GULLEM)
Source: LGU GUTALAC-PUBLIC INFORMATION