Nakabenepisyo ang mga estudyante sa Pamansalan Eco-Tech High School sa Barangay Diwan human gitugyan sa Philippine Army Finance Center Producers Integrated Cooperative (PAFCPIC) ang bag-ong mga pasilidad isip kabahin sa ilang “Adopt-A-School Program.”
Gipahigayon ang turnover ilawom sa Project SAFE (Securing Access, Facilities, and Environment), diin naglakip ang donasyon og entablado, hybrid inverter, computer laboratory, ug food processing room nga magamit sa pagpalambo sa kahimtang sa pagtuon ug teknikal nga kahibalo sa mga estudyante.
Sa samang adlaw, mibisita usab ang grupo kang City Mayor Roberto Y. Uy pinaagi sa usa ka courtesy call aron ipahibalo ang ilang mga inisyatiba ug palig-onon ang panag-uban sa lokal nga panggamhanan.
Gipangulohan ni BGEN Fernando S. Zabat (Ret.), presidente sa PAFCPIC, ang delegasyon nga mipasiugda sa ilang padayon nga suporta sa sektor sa edukasyon ug komunidad pinaagi sa konkretong mga proyekto.
Kini nga inisyatiba usa ka dakong tabang sa pagpauswag sa kalidad sa edukasyon sa kabatan-onan sa maong lugar, ilabi na sa aspeto sa teknikal ug bokasyonal nga pagkat-on.(IKEN B. GULLEM)
Source: Dipolog City Government