Gipasiugda ang kahandam ug koordinadong pagtubag sa krisis atol sa opisyal nga pag-abli sa “Kalasag–Zamboanga del Norte” Inter-Agency Territorial Defense Operations (IATDO) Exercise nga gipahigayon sa Manukan Gymnasium, kagahapong adlawa, Pebrero 9.
Ang kalihokan naghiusa sa nagkadaiyang ahensya sa gobyerno lakip ang Philippine Army, Philippine Coast Guard, BFP, DILG, OCD-9, PDRRMO, MDRRMO, ug uban pang partner agencies, aron palig-onon ang mekanismo sa kooperasyon sa panahon sa security threats, kalamidad, ug humanitarian emergencies.
Matod sa mga opisyal sa AFP, ang ehersisyo nagpunting sa kolektibong responsibilidad sa tanang sektor sa pagpanalipod sa katawhan ug pagmintinar sa kalinaw.
Gipadayag usab nga ang kasinatian sa Zamboanga del Norte sa pagbatok sa insurgency nagpakita sa bili sa panaghiusa tali sa gobyerno ug komunidad.
Pinaagi sa Kalasag–ZDN, gipamatud-an sa probinsya ang padayon nga paningkamot sa pagpalig-on sa institutional trust, kahandam, ug seguridad alang sa tanang Zanortehanon.(IKEN B. GULLEM)
Source: Zamboanga del Norte Provincial News