Nakaangkon og direktang tabang ang mga mag-uuma sa Dapitan City human sila makadawat og fertilizer assistance kaniadtong Pebrero 9, 2026 sa City Agriculture Office (CAO).
Kapin sa 100 ka sako sa Philphos Complete Fertilizer (14-14-14) ang gipanghatag sa mga mag-uuma gikan sa barangay Antipolo, Ilaya, Ma. Uray ug Ma. Christina. Kini nga tabang nagtumong sa pagpakunhod sa gasto sa pagpanguma ug pagpalambo sa ani sa humay, ilabi na sa mga uma nga naa sa irrigated areas.
Usa sa mga benepisyaryo, Mario Quitoy, Presidente sa Antipolo Farmers Association, miingon nga dako kini og tabang sa ilang panginabuhian tungod kay makapamenos sa ilang gastuhan ug makatabang sa mas maayong produksyon.
Sumala ni City Agriculturist Cyril Patangan, ang programa kabahin sa padayong suporta sa lokal nga kagamhanan aron matabangan ang sektor sa agrikultura.
Gipangunahan ang distribusyon ni Mayor Evelyn “Belen” T. Uy, nga mipahayag nga magpadayon ang dakbayan sa paghatag og konkretong tabang sa mga mag-uuma batok sa kamahal sa presyo sa abono.(IKEN B. GULLEM)
Source: City Government of Dapitan