Na-oktaba ang pagpahigayon sa Alay Padyak 2021 kagahapong adlawa, Oktubre 10 ning tuiga tungod sa “severe weather condition” nga nasinati gumikan usab sa Tropical Storm “Maring” nga misulod sa PAR (Philippine Area of Responsibility) nga nagdulot sa makusog nga ulan.Subay niini, ang Alay Lakad Council ning siyudad ang mipatawag og hinanaling tigum kaganihang buntag, Oktubre 11 aron mahisgutan ang mga angayang lakang alang na sa “re-scheduling” niini. Sa nasangpit nga tigum, sa pagpanguna ni Mayor Darel Dexter T. Uy, nasabutan nga ang ALAY PADYAK 2021 ang ipahigayon karong Oktubre 17, Domingo, sa susama gihapon nga oras (alas 4:00 ang takna sa kaadlawon) ug lugar (Dipolog City Boulevard) kon moduyog ug maayo ang dagan sa panahon.
Sa gihapon, ang Alay Lakad Council ang nag-awhag sa mga “bikers” dinhi sa siyudad nga mosalmot niining nasangpit nga “Ride-for-a Cause”.
Gidasig usab ang katawhan sa pagsuporta ning maong kalihokan pinaagi sa pagpalit og mga raffle tickets didto sa City Treasurer’s Office ning dakbayan isip paagi sa ilang donasyon. Mas daghang tickets ang paliton, mas dako ang tsansa nga makadaog sa tulo (3) ka majors prizes nga gilangkuban sa “mountain bikes” nga nagkantidad og ₱ 30,000.00, ₱ 15,000.00 ug ₱ 10,000.00 alang sa 1st, 2nd ug 3rd prize. Samtang adunay 40 ka mga tag tunga sa sako (25kls) nga bugas ang paga-bolahon isip consolation prizes.
Samtang kadtong nagtinguha nga magbaton og handumanan ning maong tinuig nga kalihokan, makapalit usab sila sa “ALAY PADYAK T-SHIRTS” didto sa buhatan sa City General Services Office, ning siyudad.
Ang inyong gamay nga donasyon ang magka-hulugan og dako ngadto sa kaugmaon sa atong mga kabatan-onan kinsa adunay malantip nga kaalam apan naglisod sa pagtungha gumikan sa kalisod.
Kahinumduman nga temporaryong gibansagan sa ALAY PADYAK 2021 ang Alay Lakad karong tuiga, gumikan kay ang mga partisipantes niini ang managsakay sa mga bisekleta aron sa pagsiguro nga masunod gihapon ang Minimum Health Protocols nga gitakda sa atong kagamhanan. Dili sama sa naglabay’ng mga tuig nga ang mga partisipantes niini ang gi-awhag sa paglakaw lamang isip usab ehersisyo. (City Information Office)
(Source: Dipolog City Government Facebook page)
