Nagkahiusa ang City Government of Dapitan sa pagpahigayon og consultative meeting aron hisgutan ang proposed health card plan alang sa mga empleyado sa gobyerno, nga nagtinguha nga mas mapaayo ang access sa serbisyong panglawas sa mga kawani.
Gipangunahan ni Mayor Evelyn “Belen” T. Uy ang maong diskusyon atol sa Monthly Executive Meeting nga gihimo sa Amphitheater, New Government Center niadtong Abril 20.
Tumong niini ang pagtan-aw sa mas episyente ug inklusibong paagi sa paghatag og health benefits pinaagi sa Health Maintenance Organization (HMO) coverage.
Gipresentar ni City Administrator Danilo S. Areños Jr. ang detalye sa plano, diin lakip sa benepisyo ang access sa konsultasyon sa doktor, preventive healthcare services, ug medical assistance sulod sa HMO network. Gihisgutan usab sa mga head of offices ang mga posibilidad ug paagi aron mas masiguro ang hapsay nga implementasyon niini.
Kini nga konsultayson kabahin sa padayon nga paningkamot sa syudad nga mapalambo ang welfare sa mga empleyado ug masiguro nga ang ilang benepisyo sa panglawas motubag sa tinuod nga panginahanglan sa serbisyo publiko.(IKEN B. GULLEM)
Source: City Government of Dapitan