Usa na usab ka mahinungdanong lakang sa paghatag og mas luwas nga agianan alang sa mga residente ang pormal nga gipahigayong turnover sa ₱5-milyon Hanging Foot Bridge sa Barangay Denoman, Roxas, Zamboanga del Norte kaniadtong Hulyo 4.
Gipangulohan ni Congresswoman Hon. Irene “Ate Ai” G. Labadlabad ang maong kalihokan isip kabahin sa padayon nga pagdala sa mga proyekto sa imprastraktura nga naghatag og konkretong kausaban sa kinabuhi sa katawhan, ilabina sa mga komunidad nga nagkinahanglan og mas maayong akses.
Dungan nga nagsaksi sa turnover sila Mayor Hon. Ismael A. Rengquijo Jr., Board Member Hon. Dante G. Bagarinao, mga miyembro sa Sangguniang Bayan sa Roxas, ug mga opisyal sa Barangay Denoman.
Nakig-uban usab si Gov. Darel Dexter T. Uy sa maong okasyon aron ipakita ang suporta sa proyekto. Sumala kaniya, ang Hanging Foot Bridge usa ka simbolo sa lig-on nga panagtambayayong sa nasyonal, probinsyal, ug lokal nga pangagamhanan aron madala ang kalamboan ngadto sa matag komunidad.(IKEN B. GULLEM)
Source: Zamboanga del Norte Provincial News Network