Nagpahimangno ang Cebu City Police Office (CCPO) sa publiko nga dili mag-post, mag-share, o magpakaylap og peke nga impormasyon sama sa bomb threat, hulga sa pagpamusil, ug uban pang bakak nga balita nga mahimong hinungdan sa kahadlok ug kalisang sa mga tawo.
Sumala sa CCPO, seryosohon sa kapulisan ang tanang hulga sa kaluwasan sa publiko bisan pa og giingong prank o binuang lamang. Ang matag report ilang imbestigahon aron masiguro ang kaluwasan sa komunidad.
Gipasabot usab sa CCPO nga mahimong kasohan ang mga tawo nga responsable sa pagpakaylap og mga peke nga hulga. Matud pa nila, posible nga masubay sa mga awtoridad ang gigikanan sa mga post sa internet.
Gihangyo sa kapulisan ang publiko nga mahimong responsable sa paggamit sa social media. Kinahanglan usab nga sigurohon una ang kamatuoran sa impormasyon sa dili pa kini i-share ug ireport dayon ang tinuod nga hulga sa pinakaduol nga estasyon sa pulis o pinaagi sa opisyal nga emergency hotlines.
Gipasalig sa CCPO nga magpadayon sila sa pagpanalipod sa kaluwasan sa katawhan ug nag-awhag sa tanan nga magtinabangay ug magmatngon aron mapadayon ang kalinaw ug kahapsay sa komunidad.
I via Renante Socia Lada