Pag-ayo ug pagpalapad sa delikadong dalan nga nagdugtong sa Sitio Logdeck ug Sitio Barko-Barko sa Barangay Sto. Niño padulong sa Sitio Salansangan sa Barangay Paniran, gisugdan na sa lokal nga kagamhanan sa Sibuco, kini aron mapugngan ang nagbalik-balik nga aksidente ug mapalambo ang transportasyon sa maong lugar.
Giila ang dugay ng dalan nga peligroso tungod sa kahagip-ot, kalapokon ilabi na kon ting-ulan, ug kakulang sa drainage system nga hinungdan sa paspas nga pagkaguba sa kalsada.
Aron masuta ang tinuod nga kahimtang, nagpahigayon og ocular inspection si Mayor Joel Ventura uban sa mga opisyal sa lungsod aron mailhan ang mga kritikal nga bahin nga kinahanglan dayong ayuhon.
Lakip sa gihimong mga buluhaton ang pagpalapad sa dalan, road gravelling, ug pagbutang ug pag-ayo sa line ditch canal aron malikayan ang pagtapok sa tubig nga makadaot sa kalsada.
Gilauman sa lokal nga kagamhanan nga kung mahuman na ang proyekto, mas luwas ug mas hapsay na ang pagbiyahe sa mga residente ug mas sayon ang pagdala sa mga produkto sa merkado, nga makatabang sa pagpalambo sa panginabuhian sa komunidad.(IKEN B. GULLEM)
Source: Zamboanga del Norte Provincial News Network