Dali nga aksyon sa mga bombero nakapugong sa posibleng mas dakong sunog human na kontrol ang grass fire nga nahitabo sa By-pass Road, Barangay Minaog niadtong Abril 22, 2026, alas 2:05 sa hapon.
Sumala sa Bureau of Fire Protection (BFP) Dipolog City, ang team nga gipangulohan ni FSINSP Aprilyn B. Barbaso, Acting City Fire Marshal, mihatag dayong tubag sa report sa sunog sa kasagbotan. Sa paspas nga koordinasyon ug lihok sa mga rumespondeng personahe, napalong dayon ang kalayo ug napugngan ang posibleng pagkaylap niini ngadto sa duol nga mga lugar.
Matud pa, walay naitalang napinsala o nasunog nga kabtangan sa maong insidente, apan giila sa BFP nga dako ang risgo sa ingon nga mga sunog ilabina panahon sa uga nga klima.
Samtang, gipahimangnoan sa BFP ang publiko nga likayan ang mga buhat nga mahimong hinungdan sa grass fire sama sa pagsunog og basura ug paglabay og upos sa sigarilyo sa kasagbotan. Gidasig usab ang tanan nga magpabiling alerto aron malikayan ang mas seryosong sunog sa komunidad.(IKEN GULLEM)
Source: Bfp R9 Dipolog City Fire Station