Gipahalipayan ni Governor Rosalina “Nanay Nene” Jalosjos ang tanang midaug sa ZPRAA 2025 kinsa maoy mo-representar unya sa Zamboanga Peninsula alang na sa Palarong Pambansa niining tuiga.
Kini ang mensahe ni Governor Jalosjos nga gipabati ni Former 3rd District Congressman Cesar Jalosjos atul sa Closing Program sa Zamboanga Peninsula Regional Athletic Association (ZPRAA) Meet 2025 nga gipahigayon sa lungsod sa Siocon, Pebreo 23-27 niining tuiga.
Mapasigarbuhon ang gobernador sa tanang atleta sanglit gipakita nila ang ilang tiunay nga batasan sama sa pagkighalubilo sa ilang kaubang atleta ug ingon man gipasibaw ang sportsmanship. Sa maong paugnat sa kusog, nakakuha usab ug dugang higala ang mga atleta gikan sa nagkalain-laing delegasyon.
Gipasalamatan usab sa inahan sa probinsya ang Department of Education kinsa maoy nagpasiugda sa ZPRAA Meet. Gidayeg ni Governor Jalosjos ang ilang nahimo gikan sa pagplano hangtud na sa logistics alang sa kalampusan sa maong kalihukan.
Ingon man, mipaabot usab si Governor Nene Jalosjos sa iyang dakong pagpasalamat ngadto sa Philippine Army nga gipanguluhan ni Col. Jimmy Sanz sa 97th IB ug sa Philippine National Police nga gipanguluhan ni PCol Rainier Diaz ug uban pa sa paghatag ug seguridad alang na sa pagpahigayon sa ZPRAA 2025 sa lungsod sa Siocon.
Dako usab ang pagdayeg ug pagpasalamat ni Governor Jalosjos ngadto ni Siocon Mayor Ceasar Soriano sa talagsaon ug world-class sa paghost sa ZPRAA 2025. “We congratulate you, Mayor Soriano. You have raised the bar of excellence as a host of ZPRAA 2025. Zamboanga del Norte is honored to have an excellent Mayor like you.” matud pa sa mensahe ni Governor Jalosjos nga gipabati ni Former 3rd District Congressman, Cesar Jalosjos.
Gipasalamatan usab ni Governor Jalosjos ang Labaw’ng Makakagahum gumikan kay nahimong nagmalampuson, malinawun ug mabungahon ang ZPRAA Meet 2025 nga gipahigayon sa maong lungsod. Nasayran nga ang ZPRAA Meet 2025 nagdala sa tema “Fostering Patriotism Through Sports”.(Angelica T. Obina)
SOURCE: PIC-Sheng Jumalon Bala