Gipangulohan ni Governor Darel Dexter T. Uy, ang joint meeting sa Provincial Local Health Board (PLHB) ug Provincial Nutrition Council (PNC) aron palig-onon ang implementasyon sa Universal Health Care (UHC) ug mga programa sa nutrisyon sa lalawigan, nga gipahigayon sa 2nd Floor Plenary Hall sa Convention and Exhibition Center.
Gipasiugda sa gobernador ang panaghiusa sa mga ahensya sa gobyerno, lokal nga pangagamhanan, ug komunidad aron masiguro ang padayon ug epektibong serbisyo sa kahimsog ug nutrisyon sa katawhan.
Lakip sa mga gihisgutan nga agenda ang reorganisasyon sa Provincial Nutrition Council, pagtukod sa Provincial Implementation Team alang sa Responsible Parenthood and Reproductive Health (RPRH), ug ang Provincial Awarding para sa 2025 Seal of Child-Friendly Local Governance nga giapil ang pipila ka LGU sa Zamboanga del Norte lakip ang Dipolog City, Dapitan City, ug uban pang lungsod sa probinsya.
Gidapit ni Gov. Uy ang tanang partisipante sa aktibong panagtinabangay pinaagi sa koordinasyon sa mga LGU, regional line agencies, ug partner agencies aron mapalambo ang kalidad sa health ug nutrition services. Gitumong sa miting ang paglatid sa klaro nga direksyon sa mga polisiya ug programa sa kahimsog ug nutrisyon sa lalawigan alang sa 2026.(IKEN B. GULLEM)
Source: Zamboanga del Norte Provincial News Network