Sa paningkamot nga mapahapsay ug mapatuman ang hustong pagbahin sa yuta, gipasiugdahan sa Department of Agrarian Reform (DAR) Zamboanga del Norte ang usa ka pulong-pulong sa Barangay Raba, Godod, isip pagpangandam sa land survey ubos sa Project SPLIT alang sa mga Agrarian Reform Beneficiaries (ARBs).
Gipangulohan ang kalihukan ni PARPO II Daisy Dell Suan Digamon, diin gipasabot ang tumong sa survey lakip ang tukmang pagtino sa mga utlanan sa yuta, pagsulbad sa nagbangga nga mga claim, ug pagsiguro nga matag benepisyaryo makadawat og klaro ug legal nga luna.
Gipasiugdahan usab ni MARPO Limuel G. Regalado ang mediation aron masulbad ang nag-overlap nga mga parsela sa yuta ug masiguro ang patas nga kasabutan tali sa mga ARBs. Gihatagan usab sila og giya kabahin sa proseso ug timeline sa survey.
Pinaagi sa Project SPLIT, padayon nga ginapalig-on sa DAR ang panalipod sa katungod sa yuta ug paghatag og sigurado nga individual land titles sa mga mag-uuma sa Zamboanga del Norte.(IKEN B. GULLEM)
Source: DAR Zambonorte