Daling mitubag ang Sindangan Central Fire Station sa usa ka emergency medical call sa Barangay Lower Inuman niadtong Hunyo 28, diin usa ka 53-anyos nga babaye ang naangol human madulas ug mahagbong sulod sa banyo.
Sa pag-abot sa mga responder, nakit-an nilang conscious apan nalibog ang pasyente. Nasuta sa inisyal nga assessment nga adunay bun-og sa wala nga bahin sa ulo, apan walay nakitang grabeng samad o aktibong pagdugo.
Gipatuman dayon sa BFP ang angayng prehospital care, lakip ang pagmonitor sa kahimtang sa pasyente ug pag-amping sa iyang liog atol sa pagbalhin niini ngadto sa stretcher tungod sa posibleng kadaot gikan sa pagkahagbong.
Human mahatagan og unang tabang, gidala ang pasyente ngadto sa Sindangan District Hospital alang sa dugang medikal nga pag-atiman ug hapsay nga gitugyan sa mga healthcare personnel.(JENIFFER JR. DELICA)
Source: BFP R9 Sindangan Municipal Fire Station v2