Gipasalamatan sa tag-iya og Cellphone ang usa ka Good Samaritan, sa Dapitan City, Zamboanga Del Norte, nga nag-uli sa Cellphone ngadto sa buhatan sa Kapulisan sa Barangay Dawao, dakbayan sa Dapitan, niadtong nakalabay’ng adlaw, Setyembre 02, 2025.
Base sa report sa Dapitan Pnp, nga nakaplagan ni Mr. Iram Sales Icao ang naasoy nga Cellphone, didto sa Barangay Dawo sa nahisgutang Siyudad, sa may alas 5:40 sa hapon, og sa walay paglangan, iya dayon kining gihatod sa Dapitan City Police Station.
Wala usab nagdugay, giadtuan dayon sa tag-iya sa maong Cellphone, nga si Lady Angel E. Pinaran, nga Lumolupyo sa Barangay Bagacay, Lungsod sa Sibutad, ning mao ra usab nga Probinsiya, ang buhatan sa Kapulisan, aron kuhaon ang nasangpit nga Cellphone nga iyang gipanag-iyahan.
Dugang pa niini, nga dako kaayo ang pagpasalamat sa nahisgutang indibidwal, ngadto kang Mr. Icao, nga uli sa iyang Cellphone, tungod kay isip usa ka estudyante, gikinahanglan gyud niya pag-ayo ang maong gamit, tungod kay mao lamang matud pa kini ang bugtong niyang magamit, isip kontak ngadto sa iyang mga ginikanan, samtang siya nagtungha sa usa ka Unibersidad, sa dakbayan sa Dapitan.(Julius Esmade)