Miuli ang usa ka good samaritan nga motorcab driver sa mahalong butang nga nahibilin sa iyang pasahero niadtong Marso 2, 2026, mga alas 10:00 sa buntag. Ang maong insidente nagpakita sa pagkamatinud-anon sa usa ka drayber dinhi sa siyudad.
Ang drayber giila nga si Francisco V. Gaas, 53 anyos, residente sa Purok 1, One Heart, Barangay Sta. Isabel, kinsa miuli sa usa ka laptop nga naa sa sulod sa bag kang Maricho M. Sabellano, 30 anyos, residente sa Barangay Biasong. Sumala kaniya, nabantayan niya nga adunay nahibilin nga butang sa iyang motorcab human mikanaug ang pasahero.
Sa walay paglangan, gidala niya ang maong laptop ngadto sa Traffic Management Office aron masiguro nga mahiuli kini sa hustong tag-iya. Human sa beripikasyon sa buhatan, nahiuli ra ang laptop ngadto kang Sabellano.
Gipahigayon ang pormal nga pag-uli sa butang sa opisina sa TMO, uban sa pagsaksi ni Traffic Director Designate Felipe T. Mangila, nga nagdayeg sa pagkamatinud-anon sa drayber nga nagpakita og maayong ehemplo sa komunidad.(JENIFFER JR. DELICA)
Source: Dipolog City Government