Mipaabot sa iyang dakong pagpasalamat si 𝐆𝐨𝐝𝐨𝐝 𝐌𝐚𝐲𝐨𝐫 𝐀𝐛𝐞𝐥 𝐌𝐚𝐭𝐢𝐥𝐝𝐨 ngadto sa 𝗗𝗲𝗽𝗮𝗿𝘁𝗺𝗲𝗻𝘁 𝗼𝗳 𝗔𝗴𝗿𝗶𝗰𝘂𝗹𝘁𝘂𝗿𝗲- 𝗣𝗵𝗶𝗹𝗶𝗽𝗽𝗶𝗻𝗲 𝗥𝘂𝗿𝗮𝗹 𝗗𝗲𝘃𝗲𝗹𝗼𝗽𝗺𝗲𝗻𝘁 𝗣𝗿𝗼𝗷𝗲𝗰𝘁 (𝗗𝗔-𝗣𝗥𝗗𝗣) ug 𝗪𝗼𝗿𝗹𝗱 𝗕𝗮𝗻𝗸 human sa gihimong Groundbreaking Ceremony sa 𝙐𝙥𝙜𝙧𝙖𝙙𝙞𝙣𝙜/𝘾𝙤𝙣𝙘𝙧𝙚𝙩𝙞𝙣𝙜 𝙤𝙛 𝙎𝙞𝙖𝙣𝙖𝙣-𝙇𝙤𝙢𝙤𝙜𝙤𝙣 𝙁𝙖𝙧𝙢 𝙩𝙤 𝙈𝙖𝙧𝙠𝙚𝙩 𝙍𝙤𝙖𝙙 sa kantidad nga 𝐏𝐡𝐩𝟖𝟎,𝟎𝟒𝟕,𝟕𝟗𝟎.𝟒𝟒 sa lungsod sa Godod, ning lalawigan sa Zamboanga del Norte, Enero 23.
Dugang ni Mayor Matildo nga ang maong dalan adunay gitas-on nga 3.445 kilometro, 5.0 metros ang gilapdon, 0.20 metros ang kabag-on niini. Nagagikan ang pundo gikan sa World Bank pinaagi sa DA-PRDP. Matud pa usab ni Mayor Matildo nga adunay 10% sa maong kantidad o PhP. 8,004,779.04 ang LGU-Godod Equity nga gipadapat sa maong proyekto.
Si Mayor Matildo ang nagkanayon usab nga sayon na unya sa mga mag-uuma sa pagdala sa ilang mga produkto sa umahan sama sa guma, kopra, humay, mais, lagutmon ug uban pa ngadto sa kamerkaduhan. Gisaysay usab sa amahan sa lungsod nga ning maong dalan lisud kaayo maagian ilabi na panahon sa ting-ulan. Niini, gikalipay nila nga masemento na ang dalan. Gipasalamatan usab ni Mayor Matildo si Presidente Ferdinand “Bongbong” Marcos, Jr. ug si DA Secretary Francisco Laurel Tiu.
Gipasalamatan usab ni Mayor Matildo ang presensya sa opisyales sa Armadong Kusog sa Pilipinas sama ni BGEN Taharudin Piang Ampatuan sa Philippine Army ang Deputy Commander, Western Mindanao Command, LTC Jimmy Sanz, Commander, 97th IB ug uban pa nga naghatag ug seguridad sa maong lungsod. Nanghinaut si Mayor Matildo nga padayon magkahiusa alang sa kalambuan sa maong lungsod.
Ang maong proyekto gikalatid nga mahuman kini karong Agosto 24 niining tuiga sulod sa 247 Calendar Days nga pagtrabaho niini. Nasayran usab gikan ni Municipal Planning Develoment Coordinator Eleonor Paghacian-Tijamo nga adunay 294 ka bubong sa Barangay Sianan ug Barangay Lomogom makapahimulos niini.
Adunay 276 ka bubong gikan sa kasikbit nga barangay sa Sipacong ug Nasibac sa lungsod sa Leon Postigo ang makapahimulos usab sa maong proyekto o 2,575 ka populasyon. Dugang ni Ms. Tijamo nga mokabat sa duha ka tuig ang paghikay ug pagkumpleto nga gisitar sa PRDP sa mga rekisitos niini ayha pa napatuman ning maong dugay na nilang gihandum nga konkretong dalan. Ang nahimong contractor sa maong proyekto mao ang Long Island Builders and Construction. (Angelica Obina)
(Source: PIC-Sheng Jumalon Bala)