Gilauman ang mas lig-on nga koordinasyon tali sa finance ug assessment officers sa rehiyon human mitambong ang 370 ka treasurers ug assessors gikan sa Zamboanga del Norte, Zamboanga del Sur, Zamboanga Sibugay, ug Sulu sa pormal nga pagbukas sa 2025 ZAMPENSU-ALTA Regional Fusion nga gipahigayon sa Top Plaza Atrium gikan Nobyembre 25–28, 2025.
Gipangulohan ang pagtigum sa ALTA-IX uban ang BLGF Region IX ubos sa tema, “Unity: in celebration of strength, resilience, and unwavering spirit of ZAMPENSU-ALTA’s.” Sa mensahe sa gobernador nga gibasa ni EA IV/PIO Rosemarie P. Miranda, gipasiugda nga ang buhis mao ang “lifeblood of government” ug giila ang vital nga papel sa treasurer ug assessor offices sa paghatag ug direksyon ug kalig-on sa lokal nga pangagamhanan.
Gipahinumduman usab nga sa unang buwan sa administrasyon ni Gov. Darel Dexter Uy, natukod ang Bag-ong Zanorte One-Stop Assistance Center (OSAC) ubos sa Executive Order No. 2, aron pasayonon ang pag-access sa serbisyo sama sa medical assistance, edukasyon ug scholarship, panginabuhian, social assistance, ug legal services.
Sa laing bahin, si Atty. Wilbert P. Tañeca, OIC Regional Director sa BLGF-IX, mipasabot nga ang panaghiusa sa upat ka probinsya nagpakita sa kapasidad sa rehiyon sa pag-atubang sa mas dagkong responsibilidad ubos sa usa ka direksyon. Samtang si Engr. Vicente P. Desoy, Provincial Assessor sa Zamboanga del Norte ug ALTA-IX President, nagkanayon nga ang pagtigum usa ka dakong higayon sa pagbinayloay ug ideya, pagpauswag sa kahibalo, ug paglig-on sa kooperasyon tali sa sektor.
Ang tulo ka adlaw nga kalihukan naglakip sa year-end performance assessment, technical sessions, wellness activities, ug general assembly, nga nagpunting sa pagpalig-on sa koordinasyon ug kapasidad sa ZAMPENSU finance ug assessment officers.(IKEN B. GULLEM)
Source: Zamboanga del Norte Provincial News Network