Gikatakdang ipahigayon sa Disyembre 2 hangtud 4, 2025 ang ika-upat nga hugna sa Social Pension Payout para sa indigent senior citizens sa siyudad sa Dipolog, sumala sa Office of the Senior Citizens Affairs (OSCA) ug City Social Welfare and Development Office (CSWDO).
Ang distribusyon pagadad-on direkta sa matag barangay aron malikayan ang kalisod sa pagbiyahe sa mga benepisyaryo. Gipangulohan kini ni OSCA Head Sancen D. Caroro ug CSWD Officer Patrick S. Jalapadan.
Giingon sa CSWDO nga andam na ang tanang venue ug gipasiguro nga hapsay ang proseso. Gipahimangnuan usab ang mga senior nga magdala sa ilang kompletong dokumento,lakip na usab sa mga gitugutan nga mga representante basta adunay dalang “Authorization Letter ug Valid ID” alang sa pag-claim niini.
Alang sa mga senior citizen nga dili makatungha sa nakatakdang iskedyul sa barangay, gitakda ang usa ka adlaw nga grace period sa Disyembre 5, 2025, alas 8–11 sa buntag, didto sa OSCA Covered Court sa Barangay Sta. Isabel. Kini nga lakang aron masiguro nga walay benepisyaryong mapakyas sa pag-claim sa ilang quarterly nga ayuda.
Gihangyo usab ang tanan nga benepisyaryo nga makig-koordinar sa ilang barangay alang sa tukmang petsa ug lugar sa payout.(IKEN B. GULLEM)
Source: Dipolog City Government