Nagpadayon ang lig-on nga suporta sa lokal nga pangagamhanan alang sa sektor sa agrikultura pinaagi sa pinasahi nga distribusyon sa binhi sa humay ug abono sa nagkalain-laing barangay sa Dapitan City. Ang kalihokan gipangulohan sa City Agriculture Office uban ang kooperasyon sa mga barangay ug Department of Agriculture–Regional Field Office IX (DA-RFO IX), nga adunay tuyo nga paspason ang paghatod sa ayuda sa mga mag-uuma.
Sumala sa City Agriculture Office, ang programa naglakip sa paghatag ug high-quality rice seeds, kinahanglanong abono, ug teknikal nga giya aron mapalugway ang produksyon ug mapaayo ang proseso sa pagpanguma. Gilauman nga kini makatabang sa pagtaas sa ani, pagdugang sa kita sa mga pamilya nga umahan, ug pagpalig-on sa seguridad sa pagkaon sa siyudad.
Ang padayon nga pag-apod-apod sa ayuda nagpakita sa kanunay nga paningkamot sa siyudad nga palamboon ang sektor sa agrikultura ug hatagan ug mas lig-on nga kinabuhi ang mga mag-uuma sa umaabot nga mga cropping season.(IKEN B. GULLEM)
Source: City Government of Dapitan