Mikabat sa 332 ka boluntaryong blood donors ang miapil sa Mass Blood Donation Drive nga gipahigayon sa Rural Health Unit (RHU) sa Salug isip kabahin sa pagsaulog sa National Blood Donor Month.
Gipangunahan sa RHU ang maong kalihokan uban sa suporta ni Municipal Mayor Dr. Ruth M. Brillantes, kinsa nagpadayon sa pagpaluyo sa mga programa nga nagpalig-on sa serbisyong panglawas ug kaayohan sa komunidad.
Nasuportahan usab ang kalihokan sa Department of Health-Regional Office IX pinaagi sa Regional Blood Program Coordinator nga si Kathryn Brooke-Ampir Halasan ug sa Zanorte Mobile Blood Donation Team nga gipangulohan ni Abigail Khio, nga mitabang sa malampusong pagpatuman sa blood donation drive.
Nagpasalamat ang RHU sa tanang boluntaryong blood donors, volunteers, ug mga partner agencies nga mitampo sa kalampusan sa kalihokan, nga nagtumong sa pagdugang sa suplay sa dugo ug paghatag og paglaom sa mga pasyenteng nanginahanglan niini.(IKEN B. GULLEM)
Source: Municipality of Salug