Bag-ong paglaum alang sa mga mag-uuma ug mga residente sa kabukiran ang gidala sa opisyal nga turn-over sa ₱39.17 milyon nga access road project sa Barangay Bagong Baguio, Sergio Osmeña, Zamboanga del Norte.
Kini nga proyekto kabahin sa SIPAG-ACCESS Roads and/or Bridges Program ug nagkonektar sa utlanan sa Zamboanga del Norte ug Misamis Occidental paingon sa Josefina, Zamboanga del Sur, hangtod sa Barangay Bagong Baguio. Gilauman nga kini makapasayon sa transportasyon ug sa pagdala sa mga produkto sa uma ngadto sa merkado.
Nahimo ang maong proyekto pinaagi sa paningkamot ni Congressman Roberto “Pinpin” Uy Jr., isip kabahin sa padayon nga pagpalambo sa imprastruktura ug konektibidad sa mga kabukirang barangay sa Unang Distrito.
Matud sa kongresista, ang bag-ong dalan dili lamang makapaayo sa pagbiyahe sa mga residente kondili makapadali usab sa pag-abot sa mga serbisyo sa gobyerno ug makapalihok sa lokal nga ekonomiya pinaagi sa mas episyenteng transportasyon sa mga ani ug uban pang produkto.
Gitambongan ang turnover ceremony nila Barangay Captain Jovie Tenorio ug mga barangay opisyal, Board Member Patrick Israel “Jimboy” Chan, Board Member Dario Mandantes, mga representante sa Department of Public Works and Highways (DPWH), ug mga residente nga misaksi sa opisyal nga pagdawat sa proyekto.
Gilauman nga ang nahuman nga access road mahimong hinungdan sa mas paspas nga pag-uswag sa panginabuhian ug mas sayon nga pag-access sa mga batakang serbisyo alang sa mga komunidad sa maong lugar.(IKEN B. GULLEM)
Source: Zamboanga del Norte Provincial News Network